A Asociación de Escritoras e Escritores en Lingua Galega (AELG) organiza o vindeiro 17 de decembro unha experiencia ao aire libre para coñecer a fondo o pasado e o presente de Porto do Son. Será a partir das 11.00 horas, ten como punto de partida o peirao do porto (baixo a estacada). A iniciativa Roteiro pola vila de porto do Son, desenvolverase na compaña da escritora local Patricia Torrado, baixo o epígrafe Da metáfora ao oxímoro.
Será unha actividade de balde para todas as persoas interesadas, que poderán inscribirse enviando un correo electrónico co seu nome e apelidos a oficina@aelg.org, dado que as prazas son limitadas.
A experiencia forma parte desta iniciativa da AELG que pretende dar a coñecer as cidades e vilas do país da man das nosas escritoras e escritores, que exercen de guías tomando como base obras propias ou alleas vinculadas a eses espazos. Deste xeito, posibilítase que a cidadanía goce en persoa dos espazos físicos na súa relación coa memoria literaria. O texto deste roteiro será publicado para a súa descarga libre na páxina web da AELG.
