Como antesala da xornada de intenso traballo do 24 de decembro, que culminará en centos de agasallos baixo as árbores da rapazada da Pobra, o Papá Noel quixo coñecer en persoa as crianzas do concello que lle remitiron agarimosas cartas cos seus desexos para estas datas. Froito deste interese, este 19 de decembro iniciouse a xira de encontros coas case 500 nenas e nenos dos centros educativos da Infantil e da Primaria.
Escolares do Monte Carmelo foron as/os primeiras/os en asistiren a esta recepción que ten o Teatro Cine Elma como punto neurálxico e ata onde tamén se desprazará nos vindeiros días alumnado do CEP Salustiano Rey Eiras, do CEP Pilar Maestú Sierra, da E.E.I. Fernández Varela e das unitarias do Vilariño, A Granxa e A Angustia.
Hai tamén programada sesión de contacontos e foto que se lles entregará como obsequio aos centros para o recordo.
A dita acción atópase ao abeiro da axenda artellada para esta época dende a Concellaría da Promoción Económica, da cal é titular a edil Charo Varela (Nós Pobra).
