O Concello de Outes fíxolle chegar á Dirección Xeral de Mobilidade da Xunta de Galicia a solicitude de ampliación das frecuencias de transporte público que comunican a Serra de Outes coa capital de Galicia. Esta solicitude faise eco da demanda veciñal, apoiada por máis de 300 sinaturas, coa que se pretende mellorar as conexión de autobús con Santiago de Compostela.
En concreto, solicítase a mellora da conexión de ida a Santiago de Compostela con tres frecuencias de saída dende Serra de Outes (ás 7 h, outra ás 14 h e outra as 21 h) así como mellorar a conexión de volta con outras tres frecuencia de saída dende Santiago de Compostela (ás 8:30 h, ás 15:30 h e ás 22:30 h). Segundo indicou o alcalde de Outes, Manolo González, convén facilitar o acceso tanto de traballadores como de estudantes que se desprazan diariamente á capital de Galicia, nomeadamente ao CHUS, á Xunta de Galicia e á Universidade de Santiago de Compostela: “No seu momento xa fixemos alegacións á proposta presentada pola Xunta de Galicia reclamando unha conexión directa entre a Serra de Outes e a capital de Galicia, agardamos que agora teñan a ben atender as demandas do concello e veciñais, posto que cada día é maior o número de persoas que se desprazan a Santiago de Compostela a diario”.
