M.A.- Segundo partido consecutivo en casa para un Rotogal Boiro Voleibol que buscará ante a súa afección os primeiros puntos na Superliga. Os de Emilio Palacio reciben este sábado 3 de decembro, ás sete da tarde na Cachada, ao Pamesa Teruel, un rival que presenta moitas novidades con respecto á anterior tempada e que se asentou na zona alta da clasificación.
Emilio Palacio, adestrador do Rotogal Boiro Voleibol, advirte que a derrota da pasada fin de semana ante Palma foi “difícil de asimilar” e engade que “era importante sacar puntos, pero é un tropezo e non hai que tolear, porque queda moita competición por diante”.
En principio, contra o Pamesa Teruel, os da Cachada contarán coa única baixa de Martín Casais, que se recupera dunha lesión no xeonllo. Si que estará Gaby del Carmen, aínda que o técnico Palacio sinala que “aínda non está ao cento por cento”.
O Pamesa Teruel ocupa a cuarta posición da Superliga despois da derrota sufrida a pasada fin de semana na cancha do líder Guaguas (3-0). Os aragoneses confeccionaron un persoal practicamente novo na que sobresae a incorporación de Rodrigo de Melo, oposto que brillou a anterior tempada na Palma e que é o segundo máximo anotador da competición. O líbero Aarón Gámiz e o central Víctor Méndez son outros dous dos xogadores destacados do conxunto aragonés.
Precedentes
Tempada 2021-2022
Rotogal Boiro Voleibol, 2-Teruel, 3
Teruel, 0-Rotogal Boiro Voleibol, 3
Tempada 2020-2021
Teruel, 3-Rotogal Boiro Voleibol, 0
Rotogal Boiro Voleibol, 2-Teruel, 3
