O Consistorio de Boiro albergou na mañá deste mércores 14 unha xuntanza de antigos alumnos participantes en cursos da UNED Sénior. No encontro participaron o alcalde de Boiro, José Ramón Romero; o concelleiro, Marcos Fajardo; o coordinador da UNED Sénior da Coruña, Luis Patiño; e a mestra dos cursos, Carmen Freire.
No encontro puxeron en común as vantaxes que teñen estas formacións e compartiron anécdotas das distintas actividades nas que participaron e nas que seguen a participar. “Boiro é un exemplo a seguir porque neste concello materializouse a finalidade dos cursos, que é crear espazos e sinerxías entre as persoas que participan para seguir realizando actividades comúns”, afirmou Carmen Freire.
O alcalde, José Ramón Romero, mostrouse moi satisfeito con todo o traballo que hai detrás da formación e tamén das actividades que desenvolven. “É un orgullo ver que seguides a propoñer actividades e que seguides apostando pola formación, por facer actividades e por mantervos activos”, afirmou o rexedor.
Pola súa banda Luis Patiño, coordinador da UNED Sénior na Coruña amosou o seu agradecemento e salientou o entusiasmo mostrado polo grupo de Boiro nestas formacións e por continuar cos programas máis alá da formación regrada. Pola súa parte, o concelleiro Marcos Fajardo deu a coñecer os esforzos do Concello en poder continuar “con esta formación e estes programas que tanta demanda teñen e que son tan importantes para dinamizar e que vos manteñades activos”.
