O Concello de Boiro realiza un mural inclusivo en Escarabote no que teñen cabida diversas entidades da parroquia como son o Sporting de Lampón, Ambar, Pedra da Aroña e a Asociación de Veciños de Lampón. Para descubrir o mural, as entidades promotoras desta proposta organizaron un encontro coa veciñanza a partir das 12.30 horas.
A proposta xorde da entidade deportiva Sporting de Lampón que, neste 2022, cumpre cincuenta anos de historia. O obxectivo da entidade é, ademais de festexar esta data, fomentar e impulsar a inclusión social, polo que buscaron alianzas coas demais entidades para solicitar o pintado deste mural ao Concello.
O deseño, feito polo artista Nove Noel, leva representadas as cores do club así como o Pazo de Goiáns e o mar, elementos que caracterizan e identifican á veciñanza de Lampón. A proposta, segundo explica o Concello, “busca facer partícipes e promover a inclusión sen importar a raza, o sexo, a situación de discapacidade ou calquera outra condición”.
A actividade está financiada polo departamento de Servizos Socias do Concello de Boiro. “Proxectos como este son de gran importancia para fomentar a participación e a implicación co voluntariado, así como a unión da veciñanza sen importar a idade ou as condicións económicas”, afirmou o concelleiro de Servizos Sociais, Raúl Treus.
