O Concello de Boiro licita obras para a mellora de camiños en Cures, A Cuncheira e Mieites

O Concello de Boiro sacou a licitación as obras para a mellora de camiños municipais de acceso a parcelas agrícolas en Cures, A Cuncheira e un camiño de Mieites a Cures. As actuacións, dun importe de 59.036,66 euros atópanse en fase de presentación de ofertas ata o vindeiro 20 de decembro.

O Concello explicou que o proxecto que se pretende levar a cabo consiste na mellora do firme de camiños rurais de titularidade municipal co obxectivo de “impulsar a cohesión social e territorial e mellorar a vertebración do territorio e das condicións de vida e traballo no rural”. Trátase de vieiros rurais nun estado deficiente, que dificultan a accesibilidade e a interrelación entre pequenos núcleos, o tránsito de vehículos e tamén o acceso a parcelas agrícolas, recordan fontes do Consistorio boirense, engadindo, máis concretamente, que en Cures actuarase nun camiño de 439 metros lineais e un ancho medio de 6 metros; na Cuncheira nun camiño dunha lonxitude de 235 metros lineais e un ancho medio de 4 metros; e entre Mieites e Cures nun camiño de 1.472 metros lineais e un ancho medio de 4 metros. O que se pretende nos tres puntos é “o planeo con apertura de cunetas e o seu pavimentado con saburra e rega asfáltica”.

As actuacións, que se atopan en licitación para a presentación de ofertas na Plataforma de Contratación do Sector Público, teñen un orzamento de 59.036,66 euros, financiados mediante o remanente de tesourería do ano 2021 do Concello de Boiro.