O Concello de Boiro, no marco das actividades do 25 de novembro (Día Internacional pola Eliminación da Violencia contra as Mulleres), reuniu a un grupo de usuarias do Centro de Información á Muller (CIM) que participan no grupo de autocoidado impulsado no mes de outubro. O alcalde, José Ramón Romero, e a concelleira de Igualdade, Dores Torrado, mantiveron un encontro con elas para coñecer como funciona o grupo e as accións que están a levar a cabo.
Inicio en outubro
O grupo comezou no mes de outubro como un obradoiro de saúde e calidade de vida de catro sesións para mulleres usuarias do CIM. A maior parte das participantes sofren ou sufriron violencia de xénero por parte das súas parellas ou ex-parellas, e moitas delas teñen vixentes ordes de afastamento, e todas elas teñen algunha historia e ninguén a quen acudir ou a quen contarlla.
De Boiro e de concellos limítrofes, son mulleres de idades comprendidas entre os 28 e os 60 anos, de clases sociais distintas e con distintos niveis de estudos. Na actualidade o grupo está composto por unhas 15 mulleres e segue a medrar, polo que quixeron manter esta xuntanza co alcalde para expoñerlle e darlle a coñecer a súa realidade.
O alcalde, en nome do Concello de Boiro, amosou o seu compromiso “de apoialas en todos os pasos que queiran seguir dando para constituír unha entidade e seguir mantendo as xuntanzas deste grupo de apoio para asesorar e apoiar a outras mulleres que pasaron ou están a pasar pola mesma situación”.
O CIM de Boiro atendeu, so no mes de outubro, a 60 mulleres, a maioría por situacións relacionadas coa violencia por parte da parella ou ex-parella. Delas, preto do 40% teñen unha orde de afastamento dos seus agresores. Moitas das usuarias do centro proveñen de municipios limítrofes nos que non hai Centro de Información á Muller.
