A asociación inclusiva da nosa comarca Ambar inaugurou este mércores 7 de decembro, no Centro Social de Cabo de Cruz, a mostra pictórica Lembranzas realizada polas persoas usuarias participantes no obradoiro de artes. A concelleira de Cultura, María Outeiral, estivo na presentación da exposición xunto con Elena Teira, coordinadora xeral da agrupación e Manuel Miné, mestre do obradoiro de arte.
A mostra está composta por obras realizadas polas persoas da asociación que participan no obradoiro. Os artistas dos cadros acompañaron á concelleira no percorrido pola exposición. “Para calquera Concello é un orgullo contar cunha exposición como esta, na que se ve e se sente a ilusión que hai detrás de cada cadro e de cada historia”, afirmou María Outeiral.
A exposición está composta por nove cadros que pintaron cada un dos alumnos do grupo no que plasmaron os seus recordos. “Cada un escolleu unha foto que lle recordase un momento especial”, afirmou o mestre Manuel Miné.
A mostra forma parte das actividades do 40 aniversario da Asociación Ambar. “Con ela festexamos e conmemoramos tamén o día internacional dos dereitos das persoas con diversidades funcionais, que se celebra o 3 de decembro”, sinalaron as responsábeis da entidade.
Lembranzas pódese visitar na sala de exposicións do Centro Social de Cabo de Cruz durante os meses de decembro e xaneiro, de luns a venres en horario de 10.00 a 14.00 e de martes da xoves de 16.00 a 19.00 horas.
