Este martes 27 de decembro o grupo Mamá Cabra estará en Boiro, na Carpa Solidaria da praza de Galicia, para organizar un obradoiro-concerto musical arredor dos arrolos: as melodías que se levan empregando dende tempos inmemoriais para acompañar ás nenas e nenos no seu descanso e demostrarlles tamén o noso amor e agarimo. Será a partir das 18.30 horas.
Mamá Cabra, para quen non o saiba, é un grupo galego de música infantil que conta coa presenza de Gloria Mosquera e Diego Maceiras.
No espectáculo que ofrecen este martes en Boiro poñen o foco nas crianzas de 0 a 3 anos. No seu transcurso interpretarán e ensinarán ás ás familias participantes neste pequeno obradoiro algúns arrolos cos que adormecer, aleitar, e tamén cos que gozar da música nos primeiros días e meses de vida. O obxectivo do grupo Mamá Cabra dende o seu nacemento é o “de transmitir o gusto pola música dende a primeira infancia e este obxectivo comeza nas voces das súas familias coas que comparten estas cancións para arrolar en galego”.
