O Concurso de Tapas en Outes, celebrado entre o 3 e o 11 de Decembro, tivo unha grande aceptación entre os veciños e visitantes. A nota predominante foi a calidade das tapas que cada local puxo en concurso e a alta participación ao longo de toda a semana. Os datos resultantes, despois do reconto, din que foron casi 2.600 tapas servidas e cunha valoración moi alta de todas elas por parte dos participantes. Dende o Concello agradeceron aos oito establecementos participantes o esforzo para mostrar o bo facer gastronómico existente no concello e animan a outros locais a que se sumen na vindeira edición. Nesta edición participaron o Restaurante Asador Albatros, o Restaurante Pepe do Coxo e o Restaurante O Taboleiro, do Freixo; Casa Amanda e Joh Turkey, da Serra de Outes; A Nosa Taberna e Casa Roque de San Ourente e Restaurante Fera, situado no lugar do Pumar en Cando. A tapa mellor valorada polos participantes foi a “TAPA DO PUMAR” do Restaurante Fera, en Cando, que recibirá por tanto o premio como gañador do concurso. Do mesmo xeito, procedeuse tamén a realizar un sorteo entre os clientes participantes dunha cea cun valor de 150 €, que será degustada nalgún dos oito restaurantes participantes, resultando agraciada Froila del Río Delfino.
