A música urbana e improvisatoria (o rap e as súas diferentes variacións) será a protagonista da grella cultural deste luns 26 de decembro en Boiro. En concreto, a área de Cultura de Concello organizou unha xeira creativa de micro aberto (primeiro) e concertos (despois) a partir das 17.00 horas, aberta á participación da xuventude local, na Carpa Solidaria instalada na praza de Galicia. Isto no que se refire á vertente aberta e participativa da xornada. A partir das 20.00 está previsto que comecen as actuacións de Colectivo Fuck Poseidon, Bonny, Trinol e Cokein. As entradas son de balde até completar aforo. Pódese contribuír coa achega de alimentos non perecedoiros.
