Finalmente entregáronse esta semana en Outes os alimentos recadados durante a estadía no concello da exposición solidaria Nós tamén fomos emigrantes, organizada pola Fundación Abanca na Casa da Cultura da Serra de Outes. O alcalde Manuel González participou in situ na entrega das doazóns aos responsábeis de Cáritas local, xunto coa directora da oficina de Abanca da Serra.
A iniciativa abeirouse ao programa Cultura por Alimentos que se desenvolveu durante a dita mostra. Esta permaneceu ao longo das pasadas semanas (até o 3 de decembro) na Casa da Cultura de Outes. Entre os colectivos que contribuíron ás doazóns atopábase o alumnado do CEIP Plurilingüe local e do IES Poeta Añón, entre outros grupos, entidades e cidadáns. A mostra contaba cunha selección de 40 fotografías de Axencia EFE sobre a emigración galega e española, principalmente dos anos 40, 50 e 60.
Esta exposición enmarcouse como dixemos no programa Cultura por Alimentos, unha iniciativa de Afundación (Abanca) a favor da Federación Española de Bancos de Alimentos.
