O Concello de Ribeira informou do inicio dos traballos para ampliar un treito de beirarrúa no paseo das Carolinas e mellorar as súas condicións de accesibilidade, dando continuidade ás obras de remodelación alí emprendidas.
Segundo o proxecto técnico elaborado, preténdese incrementar a anchura destinada ao tránsito peonil a través da desmontaxe da xardineira elevada, situada na marxe do paseo do lado da zona portuaria. O espazo resultante, segundo explican fontes do Consistorio, será usado na ampliación da beirarrúa e na proxección dunha nova zona verde ao nivel do pavimento. Amais, colocarase unha nova liña de rego e deixarase instalada unha canalización para o alumeado público.
A obra está sendo executada pola empresa Nemesio Ordóñez, S.A., e supón un investimento de 44.250 euros, IVE incluído.
O Concello lembra que tamén está prevista unha segunda actuación destinada a operar nun segundo treito das Carolinas localizado na beirada das casas (no entorno do cruce coa rúa do Estaleiro), coa finalidade de mellorar o acceso a inmóbeis e locais comerciais alí situados, así como o tránsito peonil ao tempo que se gaña no aspecto estético empregando materiais semellantes ao resto da vía.
A tal efecto serán demolidos os pavimentos existentes, construídas novas ramplas e escaleiras, así como un pavimento de formigón continuo no ámbito do proxecto. De igual xeito, vanse formar alcorques para xardineiras e situarase liñas de saneamento e pluviais. As fachadas afectadas polas obras de demolición serán acondicionadas.
