A Área de Servizos Sociais e Benestar do Concello de Dodro acadou este ano un relevante récord en reparto de alimentos. Así nolo conta o concelleiro da área Xoán Bautista Mariño (BNG), informando que grazas á colaboración de Balrial, xunto coa Deputación da Coruña con cargo ao POS Social 2022, foi posíbel atender ás 15 familias que reunían as condicións do programa de alimentos cando se deron de alta nas dependencias municipais.
Dende Servizos Sociais salientan que grazas tamén ao persoal municipal implicado foi posíbel xestionar axiña as distintas entregas “neste ano especialmente complicado”, en palabras de Xoán Bautista Mariño, que lembra que o seu departamento comezou xa o reparto de alimentos nesta mesma semana e ardan concluír en breve esta última edición do ano.
O concelleiro continúa traballando de cara ao novo exercicio para ver tamén de mellorar esta e outras iniciativas dependentes da área de Benestar. Recorda que para formar parte deste ou doutros programas dependentes de Servizos Sociais e Benestar, poden informarse ao longo de todo o ano, con cita previa, no número de teléfono 981 80 24 66.
