Tras dous anos en branco, CONGALSA retomou a súa cea de nadal con gran éxito e congregou a 320 traballadores no pazo Torre de Xunqueiras pobrense. Alí, os asistentes tiveron ocasión de gozar dun suculento banquete, ao que seguiu un animado baile que se prolongou durante varias horas.
Coa chegada dos asistentes confirmábase que tiñan gañas de celebrar a volta á normalidade. Abelorios, brillos, tacóns, gravatas, paxarelas… e, sobre todo, moitas risas conferiron á cea o ambiente festivo que requiría a ocasión. Tamén a porcentaxe de asistentes, un 70 % dos empregados que conforman o persoal da compañía, contribuía a ratificar que a gran familia de CONGALSA estaba desexosa de recuperar unha das súas principais tradicións.
