Unha sexta persoa da pasaxe foi localizada sen vida por unha patrulla da Garda Civil de Tráfico augas abaixo do Lérez.
O equipo do Pesca I do Servizo de Gardacostas de Galicia está preparado para realizar a recollida do corpo sen vida, co que ascende o número de falecidos a cinco. Isto é, cinco pasaxeiros falecidos, un desaparecido e dúas persoas feridas, entre as que se atopaba o condutor do vehículo.
Deste xeito, avanza o operativo de busca, que esta mañá volvía organizarse tras un parón durante a madrugada debido ás malas condicións: elevado caudal do río, moita corrente e o nivel de auga no interior do vehículo, que xa alcanzaba o teito.
Así, nas primeiras horas da mañá, reuníanse no lugar dos feitos, a N-541, en Pedre, os seguintes medios: Bombeiros do Deza, GES da Estrada, Protección Civil de Cotobade, Grupo de Rescate en Altura e Acuático e GEAS da Garda Civil, Grupo de Apoio Loxístico da Axencia Galega de Emerxencias (AXEGA) cun Posto de Mando Avanzado, albergue e anfibio, Grupo de Intervención Psicolóxica en Catástrofes e Emerxencias (GIPCE) do COlexio de Psicólogos de Galicia, Urxencias Sanitarias de Galicia-061, Pesca I do Servizo de Gardacostas de Galicia, Servizo Municipal de Protección Civil de Lalín e voluntarios de Protección Civil de Pontevedra.
Pouco tempo despois, eran precisamente os GEAS da Garda Civil quen atoparon dentro do autobús á terceira vítima mortal. Máis tarde, tamén unha patrulla da Garda Civil de Tráfico localizaba o cuarto falecido no río, augas abaixo do Lérez. Para a recollida deste corpo, botouse man dos rescatadores do Pesca I.
