A compañía galega de distribución alimentaria Vegalsa-Eroski e a asociación sen ánimo de lucro AMICOS -para a atención e integración de persoas con discapacidade intelectual, autismo, parálise, dano cerebral e as súas familias– renovaron hoxe o convenio de colaboración mediante o cal ambas as entidades traballan nos labores de limpeza integral de praias no marco do programa RE-MAR, un proxecto
liderado por AMICOS que ten como obxectivo a custodia ambiental para a redución dos residuos no espazo mariño protexido do arco atlántico galego.
No acto de firma, que tivo lugar hoxe nas instalacións do hipermercado Eroski de Noia, participaron a representante do departamento de RSE de Vegalsa-Eroski, Irasema Dámaso, e o responsable de Alianzas con Persoas e Empresas da asociación AMICOS, Miguel Beiro. Durante a celebración do acto, Vegalsa-Eroski fixo entrega do cheque á asociación por valor de 8.950 euros para contribuír ao programa RE-MAR de AMICOS, articulado ao redor de dous eixos de traballo: a recollida, clasificación e valorización dos residuos e a formación de educación ambiental e a sensibilización nos colexios.
Reforzo de colaboración
Con este convenio, Vegalsa-Eroski reafirma o compromiso de colaboración con AMICOS en materia ambiental adquirido na xornada de RSE que a compañía celebrou o ano pasado e onde doou 8.000 euros para cofinanciar o proxecto RE-MAR. No marco desta iniciativa, ambas as entidades tamén participaron xuntas na limpeza de varias praias da comarca do Barbanza e Ribeira, retirando delas máis de 100 quilos de residuos de diferente índole (plástico, vidro, metais, téxtil, calzado ou madeira), aproveitados, algúns, para realizar talleres de manualidades.
“É un orgullo renovar a nosa colaboración cunha asociación como AMICOS, que nos permite participar en proxectos ambientais de amplo alcance materializados en iniciativas tanxibles que permiten implicar á comunidade local de maneira constante a través da inclusión social”, sinalou Irasema Dámaso, representante do departamento de RSE de Vegalsa-Eroski.
Así mesmo, Miguel Beiro, responsable de Alianzas con Persoas e Empresas, comentou “Apaixónanos traballar “con” e “para” as persoas e o medioambiente, pero sobre todo ver como alianzas como esta, nos que as persoas con discapacidade intelectual son as protagonistas e actores principais, triunfan e
obteñen este gran respaldo”.
Proba diso é a extensión da colaboración entre Vegalsa-Eroski e AMICOS a outras ramas de actuación, como o programa integrado de emprego impulsado pola asociación e que permitiu inserir laboralmente durante o primeiro semestre de 2021-2022 a 53 persoas.
Con este tipo de accións, Vegalsa- Eroski contribúe ao coidado da contorna natural e laboral, aspectos que se enmarcan na estratexia de RSE da compañía fundamentada en tres eixos prioritarios -sustentabilidade, ámbito social e saúde-, ademais de contribuír aos obxectivos de desenvolvemento sostible que fixa a Axenda 2030 e que se atopan na folla de roteiro da entidade como empresa
responsable.
Sobre Vegalsa-Eroski
Vegalsa-Eroski conta en Galicia, Asturias e Castela e León con 281 establecementos entre propios e franquiados baixo as marcas comerciais Hipermercados e Gasolineiras Eroski, Eroski/Center, Autoservizos Familia, Cash Record, Eroski/City, Aliprox e Rapid. A súa estrutura comercial en Galicia esténdese
polas 4 provincias galegas e conta cunha moderna plataforma de mercadorías xerais, situada en Sigüeiro, A Coruña, dotada con tecnoloxías loxísticas de última xeración, ademais das plataformas de produtos frescos da Coruña e centros de redistribución en Vigo e Ourense. Pola súa banda, a división de Autoservizos Cash Récord de Vegalsa-Eroski conta cun mapa comercial composto por 18 centros distribuídos homogéneamente entre Galicia e Asturias, con fáciles e rápidos accesos en áreas empresariais con boas comunicacións
Sobre AMICOS
AMICOS contribúe a xerar oportunidades e ofrecer apoios aos proxectos de vida das persoas con discapacidade intelectual, con trastornos do espectro autista, con parálise cerebral, e ás súas familias. Traballa para conseguir a inclusión de cada persoa como cidadán de pleno dereito e promove
a construción dunha comunidade diversa con conciencia ambiental e respectuosa co seu patrimonio e cultura.
No 2023 Amicos desenvolverá a súa actividade cun modelo de intervención no que as persoas, familias e a comunidade ocupan o centro, e contará con persoas, medios, recursos económicos e alianzas para o seu desenvolvemento efectivo. A sustentabilidade é un dos seus eixos vertebradores que fixa criterios para participar activamente na consecución dos Obxectivos de Desenvolvemento Sostible da Axenda 2030, con diversas liñas de actuación, entre as que se atopa o programa RE-MAR.
