A Asociación Cultural Barbantia organiza este sábado 10 de decembro a gala dos XVI Premios Barbantia da Cultura 2022, cos que se queren recoñecer as máis destacadas contribucións creativas do que vai de ano na nosa comarca. Será no Pazo de Goiáns do concello de Boiro, ás 12.30 horas deste sábado.
Ese mesmo día presentarase o décimo oitavo volume Barbantia. Anuario de Estudos do Barbanza. A gala será retransmitida en directo por Canal Barbanza TV e por streaming a través da canle de Youtube de Barbantia para todo o mundo. Poderemos seguir a entrega de galardóns na ligazón específica da asociación. Nesa mesma xornada farase un xantar de confraternidade no Restaurante Arume (no 30 da avenida de Compostela, Boiro). Estas actividades serán organizadas por Barbantia coa colaboración da Deputación da Coruña, La Voz de Galicia e o Concello de Boiro.
Premiadas
A Asociación Cultural Barbantia deu a coñecer estes días as persoas e entidades premiadas na nova edición dos Premios Barbantia da Cultura (2022). Así, segundo o escrutinio dos votos das socias e socias, son os que citamos a continuación:
-Premio Barbantia á Traxectoria Cultural no Barbanza 2022: Ana Blanco.
-Premio Barbantia á Iniciativa Cultural no Barbanza: Museo do Gravado de Artes (FMAG).
-Premio Barbantia da Cultura Galega 2022: Xesús Alonso Montero.
