O Concello de Boiro, a través do Centro de Información á Muller (CIM) de Boiro, organizou un encontro co escritor boirense Manuel Losada, que foi escolta persoal de mulleres vítimas de violencia de xénero. O encontro realizouse no marco das xuntanzas das usuarias do centro que se celebran con periodicidade semanal.
Na actualidade Manuel Losada exerce como perito xudicial nos casos de violencia de xénero e durante moitos anos exerceu de escolta persoal de mulleres vítimas de violencia e escoltou a máis de 15 mulleres, tanto por encargo da vítima como dos seus familiares, ás que ademais de acompañalas as formaba para mellorar a súa auto-protección e seguridade. Esta experiencia profesional permitiulle coñecer de primeira man a realidade da dita lacra das agresións, o que o levou a escribir a guía Sen medo á besta.
O encontro celebrado a pasada semana, no que participaron quince mulleres, serviu para ensinar ás persoas asistentes que se pode mellorar a calidade de vida das mulleres en situación de violencia de xénero e dos seus fillos e fillas, así como sensibilizar á sociedade da realidade deste problema.
A actividade realizada polo CIM de Boiro deu inicio a unha colaboración continuada entre o ex-escolta e o Concello de Boiro co obxectivo de mellorar a calidade de vida de mulleres en situación de violencia de xénero.
