A Asociación Amicos e a Fundación Vertex Bioenergy veñen de renovar a súa colaboración a prol do medio ambiente e a integración. Así, por segundo ano consecutivo, realizarán unha actuación de reforestación de 450 piñeiros no concello de Curtis en beneficio da inclusión sociolaboral de persoas con discapacidade.
Asistiron por parte da fundación Vertex Bioenergy, Antonio Vallespir e José María Moncasi de Alvear, presidente e director respectivamente. Vallespir sinalou que “estamos encantado de contribuír á inclusión das persoas con discapacidade intelectual na sociedade a través de accións de sensibilización polo clima”.
Pola súa banda, Miguel Beiro (Amicos), comentou que “na nosa asociación temos claro que sós non podemos contribuír a cumprir os Obxectivos de Desenvolvemento Sustentábel (ODS), senón que as empresas teñen unha responsabilidade enorme á hora de facer da nosa contorna un lugar seguro, limpo e xusto, e por iso, con fundacións comprometidas como a Fundación Vertex Bioenergy conseguirémolo”.
O acordo contempla a aposta pola inclusión e o voluntariado ambiental, o obxectivo será plantar máis de 450 piñeiros coa axuda de escolares do Colexio Públicos de Curtis e o CEIP A Froula de Teixeiro nos montes do concello de Curtis.
