Con motivo das festas sinaladas nas que xa estamos mergullados, a Asociación Cultural Taller Alecrín, coa colaboración de diferentes entidades públicas e asociativas, vén de poñer en marcha na contorna da Barbanza un programa de obradoiros gratuítos para adultos baixo o nome de Baila en Nadal.
O primeiro destes, que se desenvolverá de 20:30 a 21:30 horas será de Danza Coreográfica, modalidade de baile que arrasa nas pistas de competición galega que consiste na combinación de varios ritmos nunha soa coreografía. Este obradoiro vai orientado a persoas que queiran empezar a bailar ou que xa bailen a modalidade linedance.
O segundo destes obradoiros que fará de 21:30 a 22:30 horas será de Tango Arxentino. Nesta modalidade farase unha introdución que permita ás parellas desenvolver unha coreografía que conteña os elementos básicos. “Todo un reto para parellas principiantes ou avezadas”, explican dende Alecrín.
O programa desenvolverase no Centro Cultural Deportivo de Boiro o luns, 26; na Aula de Música de Aguiño (Ribeira) o mércores, 28; na Escola Municipal de Danza de Porto do Son o xoves, 29 e no Centro Sociocomunitario da Pobra do Caramiñal o venres, 30 de decembro
Para calquera información as persoas interesadas pódense dirixir ao Taller Alecrín no Teléfono: 698 150 432.
