A nova edición da Sin-Son, chega este ano á súa 11ª convocatoria con varias novidades e con forzas renovadas logo da crise pandémica. Os detalles desta relevante e referencial carreira de Porto do Son foron dados a coñecer polos responsábeis das entidades organizadoras (áreas de Deportes e Medio Ambiente de Concello, Emesports), que sinalaron que o evento preve a participación de 2.000 deportistas, sumando a proba grande do domingo coa proba escolar e a nocturna dos cinco quilómetros (a xornada previa).
Son dous días de intensa actividade deportiva que comezaron este sábado 17 coa carreira escolar e a nocturna, en Porto do Son, e culminará o domingo 18 de decembro, coa carreira grande programada para as 11.00 horas en Portosín.
Na rolda cos medios tamén se fixo saber que os deportistas inscritos antes do 1 de decembro poderán retirar o seu dorsal nos seguintes establecementos: Bikila (Vigo), Marathon (A Coruña), Decathlon (Santiago) e Millers Run (Pontevedra).
Amais, informaron que o itinerario será o habitual, cun percorrido que tenta reivindicar a paisaxe costeira do concello ao longo dos dez quilómetros comprendidos entre Porto do Son e Portosín.
