Estes venres 2 de decembro celebrouse en Boiro, na Cachada, a nova edición (a quinta) dunha das grandes citas anuais festivas da asociación comarcal Amicos: o Festirititi, un evento co que a entidade celebra o Día Internacional das Persoas con Discapacidade e que se articula como referente da inclusión social na zona do Barbanza. O festival, que contou novamente co apoio da conserveira JEALSA, veu este ano cunha manchea de actividade para os case mil nenos e nenas da contorna do Barbanza que acudiron a participar nos xogos organizados, todos eles co nexo común de ser inclusivos e estar adaptados ás necesidades cognitivas e motrices das persoas participantes.
Macarena Fernández, integrante da Asociación Amicos, foi a encargada de abrir o certame. Ao evento acudiron, pola Xunta, Fernández González Abeijón, director xeral de Persoas con Discapacidade e Judith Fernández Novoa, directora xeral de Ordenación e Innovación Educativa. Ademais participaron diversos alcaldes da bisbarra e demais autoridades. Tamén participou, por JEALSA, Margarita Hermo, directora das Relación Institucionais da conserveira local, que dirixiu unhas emotivas palabras aos alí presentes: “As persoas con discapacidade son persoas que suman, que aportan á sociedade e que debemos facer que, cada vez máis, se sintan partícipes da mesma”.
Tras unha mañá chea de diversións e emocións, o festival pechou cunha gran sorpresa, un DJ que fixo que os case mil rapaces e rapazas saíran do Festiritititi cun gran sorriso. Dende a Asociación Amicos quixeron agradecer a colaboración de todos os colexios, concellos e empresas que participaron.
O Festiritititi é un festival de inclusión a través do xogo, onde toda a comunidade está convidada: centros educativos, autoridades e familias. A cita arrincou ás 11.00 horas no parque da Cachada en Boiro, desenvolvéndose as súas actividades ata as 13.30 horas.
