O Concello de Noia tamén mostrou nas redes sociais o seu programa de propostas de lecer para estas datas sinaladas, este punto de inflexión entre 2022 e 2023 no que temos un importante repunte da actividade cultural, e Noia, por suposto, non ía ser unha excepción. A programación, para todos os públicos, inclúe cinema, teatro, monólogos e obradoiros.
A axenda, se ben comezou xa o 3 de decembro, depáranos aínda importantes propostas, como por exemplo a función para a rapazada O Apalpador e a nena sen medo, de Xanela do Maxín (este mércores 21 ás 18.00 horas na Casa da Cultura, con entrada libre até completar a cabida); o ballet familiar O Crebanoces (inspirado na obra de Hoffman) da Escola de Danza Oitos (os días 23 e 26 de decembro ás 18.30 no Coliseo Noela, con entradas a beneficio de Cáritas e Cruz Vermella); o obradoiro musical gratuítoA Arte de Cantar, a cargo de Narci Rodríguez (os días 27, 28 e 29 de decembro, para nenas e nenos de 10 en adiante, no Local de Ensaio); a proxección do filme Klara e o Nadal na granxa (o mércores 28 no Coliseo Noela, ás 18.30 horas e con entrada libre); ou o teatro familiar Pinocho El Musical (a cargo de La Bicicleta, o día 29 de decembro ás 18.30 horas no Coliseo Noela, con venta de entradas en Ataquilla.com). Tamén haberá un obradoiro infantil de repostería de Nadal (os días 3 e 4 de xaneiro de 16.00 a 18.00 horas, na Casa da Cultura, en dúas quendas e para crianzas de 4 a 8 anos). Amais, o día 3 de xaneiro proxectarase A Patrulla Canina, A Película, será ás 18.30 no Coliseo Noela, con entrada libre até completar o aforo.
Por outra banda, o sábado 7 de xaneiro celebrarase no Coliseo Noela un espectáculo que terá como protagonista ao narrador e actor arousán Carlos Blanco, que ofrecerá ao público unha escolma dos seus mellores monólogos. Será a partir das 20.30 horas, para maiores de 16 anos. As entradas poderán sacarse en ataquilla.com ou ben o mesmo día da función no portelo do Coliseo.
Ademais, até o 10 de xaneiro podemos visitar a mostra A nosa Ría, de acuarelas de Axeitos, no primeiro andar o Edificio do Casino.
