O condutor e único ocupante resultou ferido, aínda que puido abandonar o vehículo polos seus propios medios.
Un particular informaba ao 112 Galicia, pasadas as 22:30 horas de onte, dun coche envorcado no quilómetro 19 da AG-11, á altura da saída de Taragoña (Rianxo). O condutor puidera saír polo seu propio pé e xa se atopaba no exterior dende o primeiro momento, aínda que ferido.
Ademais, por motivo do accidente quedara esparexida unha importante cantidade de aceite sobre a vía, nunha zona perigosa para a circulación. Desde o 112 avisouse, ademais de a Urxencias Sanitarias de Galicia-061, aos Bombeiros de Boiro, á Garda Civil de Tráfico, á Policía Local e a Protección Civil de Rianxo, así como aos servizos de mantemento das estradas.
Estes últimos colaboraron cos Bombeiros para despexar o asfalto e retirar o vehículo sinistrado, rematando o operativo pasadas as 00:00 horas.
