O Concello de Ribeira presentou esta tarde a primeira proposta do seu Plan de Acción da Axenda Urbana. O Plan oriéntase á construción dunha Ribeira máis eficiente e sostible, para enfrontarse aos retos que ten por diante.
A presentación tivo lugar esta tarde no Salón de Plenos do Concello e contou coa participación de Manuel Ruiz Rivas, alcalde de Ribeira (quen resaltou a importancia de planificar para definir o futuro dunha cidade), e Sonia Hernández Partal, subdirectora adxunta de Políticas Urbanas do Ministerio de Transportes, Mobilidade e Axenda Urbana, quen salientou durante a súa intervención a calidade da proposta de axenda planteada por Ribeira, que levou a que fose seleccionada como proxecto piloto a nivel nacional.
Tras as intervencións institucionais, foron representantes de TECH friendly, a empresa que desenvolveu o proxecto de Axenda Urbana durante os últimos meses, os encargados de contextualizar o proxecto e explicar as fases e resultados obtidos á hora de confeccionar unha Axenda Urbana que vai ser un factor vinculante á hora de captar futuros fondos europeos. Animaron á cidadanía para participar no proceso valorando os proxectos identificados como estratéxicos e realizando as súas achegas para seguir conformando un Plan de Acción conxunto.
Un proxecto para mellorar o futuro de Ribeira
As actuacións prioritarias identificadas durante o proceso enmárcanse en catro eixos estratéxicos, que coinciden coa visión local do futuro do municipio: Ribeira intelixente, Ribeira eficiente, Ribeira turística e Ribeira humana.
A Ribeira intelixente busca mellorar a administración electrónica e facilitar así os trámites en liña, ademais da creación dun laboratorio cidadán de ideas para impulsar a participación continua da poboación ribeirense nos avances do municipio. Pola súa banda, a Ribeira eficiente inclúe proxectos como a mellora da mobilidade en bicicleta ou os plans de transición enerxética.
A Ribeira turística céntrase na posta en valor do patrimonio cultural e a creación de novas áreas verdes, ademais do desenvolvemento dun plan de sustentabilidade turística. Por último, a Ribeira humana expón un programa de integración social para colectivos vulnerables e accións para mellorar a planificación urbanística local.
A totalidade do proxecto de Axenda Urbana, incluíndo as fases realizadas e os resultados obtidos, pode consultarse na web agendaurbana.ribeira.gal.
Participación cidadá para unha visión conxunta
Este proxecto de Axenda Urbana fundaméntase na participación da cidadanía para definir o desenvolvemento urbano de Ribeira para os próximos anos. Un primeiro paso nesta dirección foi a consulta cidadá realizada en maio de 2022 para identificar os retos e contrastalos cos que propoñía o Concello.
A sesión participativa celebrada durante a presentación busca seguir avanzando nesta intención, presentando o proxecto desenvolvido durante os últimos meses e facilitando que as persoas asistentes poidan seguir achegando as súas opinións para construír a Ribeira que visualizan para os próximos anos.
Ademais, o Concello puxo ao dispor da cidadanía un formulario en liña para que poidan seguir realizando as achegas que consideren necesarias, cousa que fixeron abordando ideas en torno á mellora da accesibilidade universal, a posta en valor da gastronomía ou a recuperación das tradicións. Este formulario estará aberto ata o 13 de decembro e pode encherse na web agendaurbana.ribeira.gal.
As achegas recibidas, xunto cos comentarios recolleitos durante a sesión de hoxe, incluiranse no Plan de Acción definitivo que se aprobará proximamente e estará igualmente dispoñible para a totalidade da cidadanía.
Ribeira continua así apostando por deseñar o seu futuro baseado na construción dun municipio máis humano, sostible e intelixente; en liña cos principios propostos pola Axenda Urbana Española.
Na sesión de mañá tivo tamén lugar outra presentación, dirixida neste caso a membros da Corporación e traballadores de diversas áreas do Concello involucradas na plasmación da Axenda.
