Coincidindo coas vacacións escolares, o Concello de Ribeira volve organizar os seus Campamentos de Conciliación (Nadal Concilia). Faino co obxectivo concreto de “ofrecer ás familias locais unha alternativa cultural e de lecer para os seus fillos e fillas”. A concelleira de Cultura María Sampedro presentou a iniciativa este martes 22 de novembro: unhas actividades, dixo, “que pretenden satisfacer as principais necesidades de conciliación das familias así como atender ás diferentes circunstancias de vulnerabilidade facilitando bonificacións a quen o precisa”.
Segundo fixo saber, poranse a disposición da veciñanza un total de 75 prazas para nenas e nenos dende cuarto de educación infantil ata cuarto de primaria. As actividades desenvolveranse dende o 23 de decembro (o día seguinte ao remate das clases) e ata o 5 de xaneiro. O lugar de celebración será o CEIP O Grupo de Ribeira, e o horario será de 9 a 14 horas aínda que, como no verán, “ábrese a posibilidade para que as familias poderán deixar aos participantes xa dende as oito e media e recollelos ata as dúas e media”, sinalou a edil, engadindo que “nestes campamentos as persoas participantes gozarán de diversas actividades, no interior do recinto e tamén polas rúas de Ribeira para coñecer a nosa cidade, o noso patrimonio cultural e medioambiental, contarán con obradoiros de igualdade, de novas tecnoloxías, actividades deportivas, e moitas outras propostas de ocio e divertimento”.
En canto ao prezo de matrícula, está fixado en 40 € e destacar que están subvencionados polo Concello de Ribeira sendo o máis axustados posibles tendo en conta o custo real do servizo.
Ademais haberá un desconto do 20%, quedando polo tanto o prezo en 32 €, para familias incluídas dentro dos colectivos vulnerábeis que reúnan algunha das seguintes condicións: familias numerosas, familias acolledoras ou monoparentais, familias con dous ou máis inscritos nesta actividade, desempregados de longa duración ou familias nas que o participante acredite unha discapacidade de ao menos o 33%. “Coma sempre”, sinalou a concelleira, “reservaremos un 10% das prazas para situacións de emerxencia social que nos derivarán dende a área de Servizos Sociais do Concello de Ribeira a través dun informe ou relación detallada elaborada polos profesionais do departamento e estando estes participantes exentos do pago da matrícula”.
O prazo de preinscrición será do 5 ao 14 de decembro de 2022 (ambos inclusive) e as solicitudes faranse a través do Rexistro Xeral do Concello de Ribeira: de maneira presencial na Oficina de Atención Cidadá do Concello (atención ao público de 9.00 h. a 14.00 h.) ou de forma telemática a través da web www.ribeira.gal. As listaxes de admisión, agarda e vacantes publicaranse o 19 de decembro na páxina web do Concello de Ribeira.
As persoas que aparezan como admitidas na listaxe deberán realizar o pagamento do importe correspondente (con ou sen bonificación) mediante autoliquidación do 19 ao 22 de decembro para que os participantes poidan así incorporarse o 23 de decembro ás actividades.
