Rianxo acolle un faladoiro sobre violencia de xénero coa soprano noiesa Esperanza Mara

Este xoves 24 de novembro a soprano, divulgadora e formadora noiesa Esperanza Mara ofrecerá en Rianxo un faladoiro no que abordará a violencia de xénero a través da literatura existente e a través da voz. A cita será ás 19:30 na Biblioteca Municipal. É unha das actividades rianxeiras para conmemorar o 25-N, o Dia Internacional pola Eliminación da Violencia contra as Mulleres.

Segundo explican dende a Área de Cultura municipal, “neste espazo de convivio traballarase a violencia a través das voces, das e dos participantes así como de libros de referencia, conbinándoo coa aprendizaxe das características da nosa propia voz e de metáforas”.

Esperanza Mara é licenciada en Canto Lírico e Violonchelo e cun mestrado en Canto e outro en Investigación Musical. É unha artista e creadora multidisciplinar que actuou nas máis prestixiosas salas e teatros de España, Portugal e Francia. É a responsábel de Emanarte, empresa que promove e divulga a música clásica en diferentes formatos e para diversos públicos así como busca a fusión con outros estilos.