M. A.- Un dos ósos máis duros de roer da Superliga visita mañá, ás 19.00 horas, o Pavillón da Cachada. O Melilla Sport Capital, vixente subcampión da competición, desafía a un Rotogal Boiro Voleibol que buscará os primeiros puntos do curso coas interrogantes que se debuxan polo estado físico de varios dos seus xogadores. O técnico Emilio Palacio contará coas baixas de Martín Casais e Gaby del Carmen, mancados, así como coas dúbidas de Juan Quelle e Pablo Nieto, que padeceron procesos febrís esta semana.
Unha das cuestións que máis preocupa na Cachada é o estado físico de Gaby del Carmen, que se lesionou nun nocello o pasado sábado durante o duelo ante o Conectabalear Manacor. Acerca do
receptor vigués, Emilio Palacio sinala que “en principio, ten unha escordadura, pero vánselle facer máis probas estes días para descartar lesións de gravidade”.
O Rotogal Boiro Voleibol segue estudando opcións no mercado comunitario, aínda que, tal como
explica Emilio Palacio “está a falarse con xogadores; estamos a tentar cerrar algo canto antes pero dependemos tamén de ter todo correcto e que as subvencións entren. Non queremos cometer erros que poidan prexudicar aos xogadores”.
Acerca do Melilla Sport Capital, o técnico do Rotogal Boiro Voleibol indica que “é un dos equipos que estará arriba. Reforzouse nas posicións de colocador e oposto para facer máis rotacións. Vencerlles será difícil, pero tentaremos xogar moito co saque. Os nosos mellores momentos en Manacor chegaron cando arriscamos e diriximos o saque, pero tamén hai que ter en conta que o ataque de Melilla tamén é máis forte que o do anterior rival”.
O Melilla Sport Capital debutou esta semana en competicións europeas. Fíxoo cunha vitoria ante o Horodok en Polonia por 0-3. Os norteafricanos, vixentes campións da Copa, manteñen o bloque da pasada campaña, no que destaca o tridente arxentino formado polo receptor Giustiniano, o oposto Federico Martina e o colocador Riganti. Ademais, tamén sobresaen outros xogadores como o central Jean Pascal Diedihou e o colocador Ignacio Luengas.
Precedentes
Tempada 2021-2022
Melilla, 3-Rotogal Boiro Voleibol, 2
Rotogal Boiro Voleibol, 2-Melilla, 3
Tempada 2020-2021
Rotogal Boiro Voleibol, 1-Melilla, 3
Melilla, 3-Rotogal Boiro Voleibol, 1
