M.A.- Terceiro desprazamento do curso para o Rotogal Boiro Voleibol, que visitará este sábado 4 de novembro (ás 19.00 horas no Polideportivo Miquel Ángel Nadal) ao Conectabalear Manacor. Os da Cachada afrontan a viaxe a terras baleares con dúas materias pendentes: sumar os primeiros puntos na Superliga e mellorar o ton competitivo como visitantes.
O Rotogal Boiro Voleibol contará coa baixa de Martín Casais, que se recupera dunha lesión no xeonllo, e coa dúbida de Alan Davila, que arrastra problemas musculares desde o adestramento do mércores. As opcións dos de Emilio Palacio para lograr algo positivo nas illas pasan por mellorar o rendemento desde o inicio do encontro e callar un partido moi completo ante un adversario que ocupa a oitava posición da táboa con oito puntos.
O Conectabalear Manacor cambiou moito con respecto á pasada campaña. Perdeu a xogadores importantes como Víctor Méndez, Thiago Vanole ou Miguel Gallego, polo que outros tiveron que asumir o protagonismo no inicio da competición. Ata a data, destacaron individualidades como o oposto José Chourio, o líbero Antoni Piris ou o central Alejandro Ribas.
Precedentes
Tempada 2021-2022
Manacor, 3-Rotogal Boiro Voleibol, 1
Rotogal Boiro Voleibol, 3-Manacor, 0.
Tempada 2020-2021
Rotogal Boiro Voleibol, 0-Manacor, 3
Manacor, 3-Rotogal Boiro Voleibol, 1
