O Centro Cultural Lustres Rivas vai exhibir a partir deste venres 18 de novembro unha nova exposición de esculturas que leva por título Madeiras vivas, a cargo do artista ourensán Moxom. A mostra abrangue unha vintena de pezas, principalmente de mulleres, talladas polo autor en distintas madeiras, dende salgueiros ata castiñeiros e plátanos. Para realizalas, o escultor sérvese de materiais atopados nos camiños, nos encoros, etc.
Xosé Manuel Rodríguez, Moxom, naceu en Ourense en 1964 e comezou no mundo da banda deseñada na década dos oitenta formando parte do Frente Comixario, colectivo dinamizador da banda deseñada en galego. Desaparecido o colectivo comezou á súa andadura como Moxom no mundo da escultura de madeira en 1996, e transformou moitos dos seus debuxos en pezas de madeira.
A exposición será inaugurada ás nove da noite do venres 18 e poderá ser visitada ata o 17 de decembro en horario de luns a venres de 10 a 14 e de 19 a 21 horas e os sábados de 11 a 14 horas.
A entrada é gratuíta.
