O Club Deportivo Boiro e Krusadas Boirenses, coa colaboración do Concello de Boiro e Cruz Vermella, realizan unha campaña solidaria de recollida de produtos de primeira necesidade de hixiene e limpeza. Na presentación da campaña, que tivo lugar esta tarde no campo municipal de Barraña, participaron o concelleiro de Servicios Sociais, Raúl Treus, o presidente do CD Boiro, Marcos Martinez; o membro de Krusadas Boirenses, Estevo Silva, e a coordinadora local da agrupación de Cruz Vermella, Natalia Romero.
A recollida de produtos será o vindeiro domingo 11 de decembro no partido que o CD Boiro disputa en Barraña contra o Ribadeo. Ademais, poderanse entregar produtos no Concello de Boiro e nas dependencias de Cruz Vermella no Centro Social de Boiro.
Trátase dunha recollida moito menos chamativa que a de xoguetes ou alimentos pero é moi necesaria, por tratarse de cousas imprescindibles e moi custosas. Os produtos que se poden aportar son os de limpeza do fogar, tales como deterxente, frega chans, frega pratos, desinfectantes…; hixiene para bebés, como cueiros ou champús; hixiene íntima de muller, como compresas e tampóns; hixiene íntima de home como máquinas e xeles de afeitado; hixiene familiar, tales como son champú, xel de ducha, pasta e cepillos de dentes, papel hixiénico.
