A conserveira boirense JEALSA, referente no seu sector e tamén no ámbito da responsabilidade social empresarial, confirmou a súa participación no Foro de Emprego FESTEM que terá lugar mañá venres día 4 de novembro na Escola Politécnica de Enxeñería de Ferrol. Organizado polo Campus Industrial de Ferrol (CIF) da Universidade da Coruña, FESTEM será un espazo de encontro entre novo estudantes e titulados e as principais empresas nacionais e multinacionais do ámbito STEM (Ciencia, Tecnoloxía, Enxeñería e Matemáticas).
“Estamos moi contentos de participar no foro FESTEM, un punto de encontro idóneo para captar unha gran variedade de perfís no ámbito da enxeñería que poidan incorporarse a diversas áreas dentro da compañía, dentro da nosa aposta global pola captación de talento e pola colaboración coas diferentes institucións educativas, especialmente en Galicia”, comentou Elena Garrido, directora de RRHH de JEALSA. Garrido tamén puxo o foco na “forte aposta de JEALSA pola innovación, a diversificación e a sustentabilidade”, unha aposta que a levou a situarse como unha das principais produtoras a nivel mundial, cun constante investimento en I D i da man do programa We Sea.
JEALSA inaugurou este ano un novo Centro Tecnolóxico, que serve como base de operacións para a creación dunha biofábrica, cun investimento estimado de 160 millóns de euros. “Grazas a esta filosofía e valores”, engadiu, Garrido, “conseguimos xa aproveitar o 100% da materia prima proveniente do peixe que chega ás instalacións, ademais de alcanzar a neutralidade en carbono a nivel de produción”.
