M.A.- A loita pola permanencia na Superliga vivirá un duelo de máxima esixencia para o Rotogal Boiro Voleibol e o Palma, que buscarán este sábado 26 ás 19.00 horas na Cachada a primeira vitoria da tempada. Os de Emilio Palacio comparecerán ante o seu público coas baixas de Gaby del Carmen, que se recupera dunha lesión no nocello, e de Martín Casais, que se restablece dunha doenza no xeonllo.
O Rotogal Boiro Voleibol afrontará mañá un duelo ante un adversario que, durante as dúas últimas
tempadas, sempre lle venceu. Na presente campaña, ambos os equipos loitan pola continuidade na Superliga. “É a partido clave da primeira volta, en casa, contra un rival directo. Será determinante ver como acaba para determinar o futuro da Superliga”, afirma Emilio Palacio. Engade que o Palma, “do mesmo xeito que nós, tivo moitos cambios esta tempada. Non está a pasar pola súa mellor situación. Eles teñen moitos xogadores novo, coma nós, aínda que si que posúen catro veteranos en posicións determinantes. Poden parecer lixeiramente favoritos por esa circunstancia, pero é unha partido clave”.
En opinión do preparador do Rotogal Boiro Voleibol, no choque de mañá “vai ser clave a maneira en que compitamos. Temos que ser máis agresivos no saque e o ataque. É fundamental que os rapaces estean concentrados ao cento por cento durante todo o partido, sen altibaixos”. O Palma, do mesmo xeito que o Rotogal Boiro Voleibol, disputou o play off polo título a pasada campaña. No entanto, sufriu unha profunda remodelación no persoal. Nela destaca a presenza dos centrais Carlos Manuel de Carvalho e Abel Bernal, que tamén exerce como adestrador, así como o colocador Xavi Folguera, o líbero José Osado e o receptor Renzo Cairús.
Precedentes
Tempada 2021-2022
Rotogal Boiro Voleibol, 2-Palma, 3
Palma, 3-Rotogal Boiro Voleibol, 1
Tempada 2020-2021
Rotogal Boiro Voleibol, 2-Palma, 3
Palma, 3-Rotogal Boiro Voleibol, 2
