Cando faltan catro días para a segunda edición do Rallye Ribeira – Ría de Arousa, a ocupación hoteleira prevista para esta fin de semana no municipio roza xa o cento por cento.
Así se desprende das consultas realizadas pola Área de Turismo do Concello entre os hoteis, hostais, campings, casas de turismo rural e establecementos singulares das diferentes parroquias, no que se constatou que a maior parte dos establecementos están completos.
Cúmprese deste xeito un dos obxectivos que se perseguía co patrocinio desta proba incardinada no campionato galego de rallyes, como é o de estimular a actividade turística e comercial no municipio nun mes considerado de tempada baixa. Presentación oficial
Cómpre informar por outra parte que mañá mércores ás oito da tarde terá lugar na Casa Consistorial a presentación oficial desta cita deportiva. Con tal motivo varios dos vehículos participantes no rallye estarán na praza do Concello.
