Boiro celebra este domingo o Día da Bici

O Concello de Boiro celebra este domingo 6 de novembro do Día Da Bicicleta, unha cita que ten como obxectivo “a convivencia”, “a diversión” e máis a participación de nenos e de adultos. O percorrido será duns 14 quilómetros e ten a saída programada para as 11.00 horas da praza de Galicia, comezando pola rúa Principal e a avenida de Compostela ata a Agramuíña, onde se realizará o primeiro reagrupamento. Continuará polo paseo marítimo para volver ao centro de Boiro pola avenida de Compostela e a avenida da Constitución e dirixirase a Cabo de Cruz pola avenida de Barraña e Esteiro. En Cabo de Cruz farase un segundo reagrupamento e regresará a Boiro polo Sestelo, Seán, Exipto e DP-106 para chegar á rúa Dereitos Humanos e percorrerá a peonil ata regresar á praza de Galicia.

Seguridade

O Concello insistiu na presentación da actividade, este martes, na importancia de garantirmos a seguridade da proba, polo que será preciso “seguir as instrucións e indicacións da organización e non saírse do percorrido fixado”. E engadiu o alcalde José Ramón Romero: “Contamos coa colaboración das forzas e corpos de seguridade como a Garda Civil e Protección Civil, os colaboradores como Club Ciclista Barbanza para coidar que todo transcorra sen incidencias e tamén a todos os patrocinadores que colaboran nesta cita”. O rexedor tamén fixo saber que este martes 1 de novembro xa había preto de 300 persoas inscritas.