Na mañá deste xoves 24 de novembro o presidente da Mancomunidade de Municipios Barbanza Arousa, Xosé Lois Piñeiro, e o representante da Asociación Cultural Aberto Romero, Santiago García, asinaron un convenio de colaboración co fin de colaborar, impulsar, difundir e promocionar as actividades creadas pola entidade cultural. Esta ten como finalidade a promoción do audiovisual a través do seu Certame de Curtas que celebra o vindeiro ano a súa sétima edición nos concellos de Barbanza Arousa, contando con moi boa acollida entre o público en xeral.
Barbanza Arousa comprométese con este convenio a colaborar na realización do proxecto VII Certame Audiovisual Alberto Romero de curtas no que participan nenas/os desde Primaria ata rapazas/es de Bacharelato, ademais de contar cunha categoría para usuarias/os dos centros de diversidade funcional e outra categoría libre aberta a todos aqueles que queiran participar.
Nesta nova edición, introdúcese como novidade unha nova modalidade chamada Barbanza Arousa, que busca a posta en valor do territorio a través dos seus recursos patrimoniais, a súa natureza e a śua historia reflectidos nos audiovisuais.
Os premios que serán entregados nesta 7ª edición ascenden a 1.800€, estando xa aberto o prazo de inscrición ata o 28 de febreiro do 2023.
De forma paralela ao certame realízanse formacións nos catro concellos de como realizar unha curtametraxe.
Con este acordo, a entidade supramunicipal da nosa comarca continua co seu plan de traballo. “É importante contar con profesionais, entidades e asociacións culturais que traballan xa no territorio, apostando así por unha implicación de proxectos culturais cos que consolidar unha proposta de turismo creativo”, explicaron dende Barbanza Arousa.
