As Mulleres do Barbanza reivindican o 25-N cunha concentración, unha exposición e a presentación do novo caderno dos Episodios Republicanos Barbanzáns

A Asociación de Mulleres do Barbanza compartiu a súa axenda de actividades para visibilizar este 25-N, Día Internacional pola Eliminación da Violencia contra as Mulleres. No cartaz conmemorativo da asociación figuran accións programadas en colaboración co Grupo de Acción Local da Barbanza de Amnistía Internacional e a Comisión pola Recuperación da Memoria Histórica da Barbanza: por unha banda a concentración contra a violencia machista do venres 25 na praza do Concello de Ribeira, ás 19.30 horas, na que se renderá homenaxe ás vítimas desta lacra (coa colaboración de Amnistía Internacional, que achega a exposición de paneis Elas son a revolución (mulleres e nenas en Afganistán); e pola outra a presentación do caderniño número 10 dos Episodios Republicanos Barbanzáns, no Centro Cultural Lustres Rivas de Ribeira a partir das 20.30 horas. Por certo que se contará para esta presentación coa presenza do escritor noiés Xerardo Agrafoxo, autor do caderniño. Este rende homenaxe a dúas mulleres represaliadas e silenciadas pola Guerra Civil e a ditadura franquista: as veciñas de Lousame Mari Pepa e Manuela.