A asociación da nosa comarca Amicos clausurou este 29 de novembro o curso Carretilla elevadora, pertencente ao seu programa Máis Emprego, que desenvolve en colaboración coa Fundación La Caixa e o Fondo Social Europeo. As sesións impartíronse na academia Ara Formación en Pontevedra. Os trece alumnos participantes recibiron un diploma recoñecendo o seu esforzo no curso. A formación, dirixida a persoas desempregadas con discapacidade ou en risco de exclusión social, tivo unha duración de 24 horas na modalidade mixta, 16 online e 8 presenciais.
A empresa Ara foi como dixemos a encargada de impartir a ensinanza, a cal permite achegar aos participantes ao mercado laboral.
Ao acto acudiu Marcos Rey Pazos, concelleiro de benestar social do Concello de Pontevedra, quen afirmou que “para o Concello foi un pracer ceder espazos na Casazul para contribuír á formación dos que máis o precisan” e aproveitou a ocasión para felicitar o Nadal ás persoas que completaron a formación. Tamén se mostrou convencido de “que este tipo de cursos que teñen unha elevada demanda laboral favorecen as posibilidade de inserción”.
Doutra banda, Miguel Beiro, responsable da área de Alianzas e Emprego de Amicos quixo dar as grazas a todos os participantes, recoñecendo o esforzo realizado e animándoos a ter unha boa actitude de cara ao mundo laboral.
Entre os asistentes atopábanse Marta Besada e Rosa Agrelo, dúas técnicas da Asociación Amicos neste programa de Máis Emprego, que quixeron agradecer aos participantes o interese e tenacidade ao longo de todo o curso. Asemade, adicaron unha palabras de agradecemento ao Concello de Pontevedra pola “súa boa predisposición” cedendo o espazo no que realizar a formación e permitindo que accións como esta sexan posíbeis.