O club sonense ADC Arnela confirmou unha nova data para XVI proba de “orientación a pé” no monte Iroite, na espectacular contorna do miradoiro da Balconada e arredores. Será finalmente o vindeiro 19 de novembro e formará parte da Liga Galega de Orientación a Pé. Amais, constitúe a derradeira proba da presente tempada 2022. Segundo informou o club sonense, xa está aberto un novo prazo de inscricións, até o domingo 13 de novembro ás 23.50 horas, para todas aquelas persoas que queiran participar. Por outra banda, quen desexe anular a súa inscrición tamén poderá facelo até esa data e seralle devolto o importe total do que tiveran aboado.
A pesar de ser unha proba federada, a participación tamén estará aberta ás categorías non federadas (iniciación); así que segundo explica a organización do evento deportivo representará “unha moi boa oportunidade para gozar deste fermoso e entretido deporte”.
As inscricións son a través da web da Federación Galega de Orientación ou do Facebook da federación.
