A pianista boirense Elsa Muñiz presentou este venres a súa nova contribución audiovisual-musical. Trátase do vídeo Navegando o camiño, unha produción audiovisual e musical que amosa a beleza natural, humana e cultural da Ruta do Mar de Arousa e Río Ulla do Camiño de Santiago no que colabora o Concello de Boiro.
A beleza dun Camiño, o do Mar de Arousa e Río Ulla; o talento feminino e emerxente, o da pianista Elsa Muñiz; e unha innovadora posta en escena son os ingredientes de Navegando o camiño, un proxecto no que a música e a creación audiovisual se fusionan para enxalzar os valores naturais, humanos e culturais deste itinerario xacobeo que conmemora a translación dos restos do Apóstolo Santiago no seu último tramo. Producido por Sonaxe Producións, Navegando o Camiño está co financiado pola Xunta de Galicia dentro do programa O Teu Xacobeo.
Elsa Muñiz (Boiro, 1992) amosa interese pola música e aos seis anos empeza a asistir a clases de piano. A súa formación profesional pasa por conservatorios e universidades de Galicia e do estranxeiro. Comeza no Conservatorio Profesional de Ribeira co Grao Elemental e Profesional en Piano para logo realizar o Grao Superior no Conservatorio de Música de Vigo e na Universidade de Música Fryderyk Chopin de Varsovia, institución esta última na que ampliou a súa formación pianística a través de estudios de posgrao.
O gusto pola ensinanza e a pedagoxía tamén afloran desde a súa nenez, de maneira que decide combinar os seus estudos musicais coa formación pedagóxica na Universidade de Santiago de Compostela a través do Grao en Mestre de Educación Primaria, con Mención en Educación Musical e Inglés.
