A ABE lanza unha nova edición da campaña #RegalaBoiro

A Asociación Boirense de Empresarios vén de lanzar unha nova edición campaña #RegalaBoiro, cuxo obxectivo, novamente, é fomentar as compras a través os aguinaldos empresariais. A metodoloxía seguida será a seguinte: póñense en xogo unha serie de bonos-regalo, dispoñíbeis durante todo o ano, co fin de que os utilicen as empresas para obsequiar ás súas traballadoras e traballadores durante a época de Nadal. No que vai de 2022 vendéronse bonos por importe de 8.815 euros que repercutiron positivamente nos negocios asociados. Este venres 4 estreouse o anuncio da campaña deste ano.

Os bonos-regalo da ABE

Os bonos-regalo da ABE están activos durante todo ano, a disposición dos clientes de Boiro para que poidan utilizalos para agasallar a quen queiran e cando queiran (Nadal, aniversario, días especiais ou calquera outra ocasión). Agora, de cara ao Nadal, a patronal pon en marcha unha campaña publicitaria denominada #RegalaBoiro pola que pon os bonos a disposición das empresas para utilizalos no tradicional aguinaldo que ofrecen aos seus empregados cada remate do ano.

O anuncio da campaña xa está dispoñíbel para visualizar nas plataformas Youtube e Vimeo así como nas redes sociais da ABE; Facebook, Instagram e Linkedin, para velo so temos que premer nas ligazóns ou buscar #RegalaBoiro.

Neste intre, froito do traballo realizado, a ABE xa conta con varias empresas que van a utilizar os bonos para regalar aos seus traballadores (ou para complementar as tradicionais cestas de Nadal).

Vantaxes

1. Están adaptados aos gustos e necesidades de cada persoa xa que podemos usalos en calquera dos preto de 200 socios e socias da ABE.

2. O seu consumo é local, repercute nas propias empresas do pobo, nos nosos veciños e veciñas

3. Amósase unha imaxe de unidade do tecido empresarial de Boiro e aportan a ABE unha presencia moderna e adaptada aos novos tempos.

4. Eliminan o problema de “non sei que regalar” ou o de “gustaralle?”

5. Pero sobre todo … estamos regalando “Boiro”!