Miguel Álvarez.- O Rotogal Boiro Voleibol ofreceu unha gran imaxe no debut na Superliga. Cun equipo que presentaba moitas novidades e a baixa dos seus tres estranxeiros, competiu de ti a ti contra o Unicaja Almería, o vixente campión. Os andaluces fixeron valer a súa maior experiencia para pechar o choque pola vía rápida (0-3).
O Rotogal Boiro Voleibol deu boas sensacións desde o inicio. Con debutantes como Héctor Barro ou Jaime Arjones no equipo, plantáronlle cara a un Unicaja Almería que empezou o partido con contundencia.
Un parcial de 0-4 no arranque serviulles aos visitantes para marcar o territorio e para asumir unha dianteira que xa non abandonarían ao longo do primeiro set (20-25).
O equipo de Emilio Palacio elevou o rendemento na segunda manga, cando chegou a colocarse por diante en varias fases do xogo. Con todo, o Unicaja Almería espremeu o seu potencial no saque e as boas prestacións no bloqueo para aferrarse ao set. O Rotogal Boiro Voleibol puido adxudicarse o segundo parcial, pero acabou cedendo por un axustado 23-25.
No ecuador do terceiro set, o Unicaja Almería marchouse no marcador e aproveitou a situación para repartir minutos entre todos os seus efectivos. O Rotogal Boiro Voleibol non lanzou a toalla, pero non
puido remontar e pechou o parcial cun 22-25 en contra.
Rotogal Boiro Voleibol, 0: Alan Davila, Mario Iglesias, Jaime Arjones, Gaby del Carmen, Héctor
Barro, Juan Quelle e Adrián Alves (líbero). Tamén xogaron Ismael Martínez, Pablo Nieto e Aarón
Vidal.
Unicaja Almería, 3: Moisés Cezar, Bakonji, José María Giménez, Jorge Fernández, Marco Ferreira,
Víctor Rodríguez e Francisco Fernández (líbero). Tamén xogaron Raúl García, Andrés Portero, Pau
Delós e Javier Vizcaíno.
Sets: 0-1 (20-25), 0-2 (23-25) y 0-3 (22-25).
Árbitros: Francisco Sabroso e Ainhoa Saiz.
Incidencias: Partido da Superliga disputado no Pavillón de A Cachada ante uns 350
espectadores.
