A Deputación da Coruña confirmou que a Ugia Pedreira (Foz, 1970) e Quico Cadaval (Carreira, Ribeira, 1960) son os protagonistas do episodio da serie web Referentes do mes de outubro, que se poderá ver a partir das 12 horas do venres 28 de outubro no Facebook e máis no Youtube da área de Cultura da Deputación da Coruña.
A vida enriba dos escenarios, as mulleres das súas vidas, a música, as artes escénicas, a retranca, e os comezos das súas respectivas carreiras, centran a conversa neste novo episodio da tempada, que é, segundo confirmou a entidade provincial, o penúltimo do ciclo.
Ambos contestarán, ademais, á pregunta que os referentes do anterior episodio (María Reimóndez e Oliver Laxe) lles deixaron formulada: dunha banda “que conten algunha experiencia que tivesen na colectividade e que experimentasen como algo transformador”, e por outra “que indiquen que lles falta para ser máis coherentes ou estar máis conectados cos seus corazóns”.
Nesta segunda tempada de Referentes, que se estreou o pasado mes de abril, participaron Margarita Ledo en conversa con Xabier Fortes, Melania Freire con Pepe Barro, Pepe Solla con Manuel Gago, María Reimóndez con Oliver Laxe, e Ugia Pedreira con Quico Cadaval. A segunda tempada de Referentes rematará cun último episodio no mes de novembro.
