A Concellería de Servizos Sociais de Ribeira, en colaboración co Fondo Galego de Cooperación e Solidariedade, organiza un obradoiro gratuíto de debuxo urbano para mozas e mozos de idades comprendidas entre os 16 e os 19 anos e con afección ao debuxo. A escola profesional de banda deseñada e ilustración profesional de Pontevedra, a escola O Garaxe Hermético, será a encargada de impartir esta actividade, que se desenvolverá ao aire libre, o mércores 19 de outubro en horario de 16h a 20h.
As persoas participantes debuxarán a antiga fábrica de salgadura de Punta do Castro en Castiñeiras, empregando lapis e grafito acuarelábel (art graft), para, en palabras da organización da actividade, “poñer en valor o patrimonio etnográfico e ecolóxico da nosa contorna”.
Non precisarán levar ningún material.
Este obradoiro estase a impartir en varios concellos de Galicia co obxectivo de reivindicar a paisaxe e o entorno “dende un punto de vista de concienciación ecolóxica e sustentábel”. Con posterioridade elaborarase un libro, cos debuxos realizados e os textos do escritor Manuel Lourenzo González, que se distribuirá entre as persoas que participen na actividade.
Para formalizar as inscricións ou ampliar información cómpre contactar co Departamento de Servizos Sociais a través do correo electrónico: servizossociais@ribeira.gal ou no teléfono 981377512. O prazo de inscrición remata o 18 de outubro.
O Concello de Ribeira é socio colaborador do Fondo Galego de Cooperación e Solidariedade dende hai mais dunha década. Trátase dunha asociación sen ánimo de lucro integrada por administracións locais de Galicia unidas pola vontade común de contribuír á erradicación das desigualdades Norte-Sur, a través de proxectos de cooperación ao desenvolvemento con países empobrecidos e a sensibilización social en Galicia. Para ampliar información sobre esta plataforma pódese consultar a web www.fondogalego.gal.
