Sarabela Teatro chega este venres a Rianxo para representar Morgana en Esmelle

Sabarela Teatro estará este venres 14 de outubro en Rianxo para representar o seu espectáculo Morgana en Esmelle, no Auditorio Municipal a partir das 21.00 horas. Trátase dunha función de balde (até completar capacidade) para público de máis de 12 anos. A recollida de convites farase dende unha hora antes do comezo do espectáculo (máximo dous por persoa).

A peza cóntanos a historia de Morgana, a medio irmá e amante de Artur, xusto no intre en que entra na casa de Miranda en procura de respostas á súa infelicidade. Morgana en Esmelle é unha reflexión que xira ao redor da responsabilidade de asumir as consecuencias non desexadas de cada un dos nosos actos: un debate sobre a necesidade de adoptar compromisos incómodos e implicarse nos momentos históricos.

A obra está baseada nunha das pezas máis destacadas da nosa literatura recente: a novela do mesmo nome da tristemente falecida Begoña Caamaño, á súa vez debedora de Merlín e familia de Cunqueiro. Morgana en Esmelle foi no seu día un éxito de lectores e máis de crítica (recibiu o Premio Ánxel Casal, Premio Losada Diéguez, Premio ALG, Premio Nacional da Crítica).

Sarabela Teatro quixo con esta adaptación teatral establecer un diálogo directo coa súa autora para “devolver ás espectadoras e espectadores unha parte pequena do seu universo único”.