Regresan os Premios ABE á Excelencia Empresarial

Ser unha empresa innovadora, puxante, responsábel socialmente e creativa, vai ter premio novamente en Boiro. Así o confirmou este luns 24 de outubro a Asociación Boirense de Empresarios (ABE), que presentou unha nova edición dos seus Premios á Excelencia Empresarial, que xa ten aberto período de votacións. A patronal fixo balance tamén da anterior convocatoria: un éxito de participación e repercusión, con máis de 120 persoas asistentes á gala de entrega de galardóns.

As empresas asociadas xa poden votar para elixir entre os 200 socios da patronal quen serán a mellor empresa e o mellor comercio de 2022. Para votar só terán que acceder ao formulario que vai ser habilitado en liña e elixir os seus comercios e empresas favoritas. Teñen de prazo dende hoxe e ata o luns 7 de novembro.

Ademais deses dous premios a directiva da ABE outorgará o premio de honra a unha empresaria ou empresario recoñecendo a súa traxectoria e contribucións á economía local.

A gala deste ano celebrarase novamente na Pousada da Galiza Imaxinaria o venres 18 de novembro. Contarase con presentador, música en directo, photocall, agasallos, bebida e comida para todas as persoas asistentes.