Paco Nogueiras está este domingo en Porto do Son co espectáculo C@nto contigo

Ao abeiro do programa FalaRedes 2022, impulsado pola Secretaría Xeral de Política Lingüística, Porto do Son vai recibir a visita esta fin de semana do músico e multiinstrumentista galego Paco Nogueiras, que ofrecerá á rapazada local (e tamén aos maiores) o espectáculo C@nto contigo. Será este domingo 23 de outubro ás 17.30 horas, na Casa da Cultura de Porto Son. Non será preciso retirar entrada.

Neste espectáculo Nogueiras dá un novo paso adiante no seu incansábel labor de achegar á nenez a múltiples estilos e propostas musicais, co engadido extra de facelo en galego.

C@nto contigo é unha proposta onde a música, o baile e as risas farán que saquemos a nosa lingua a voar, achegando o galego á xente miúda e ás súas familias de xeito lúdico e divertido. Retrousos e cancións para participar activamente, bailando sen complexos, acompañando coa voz, coas palmas ou con acenos. Un percorrido por cancións da súa traxectoria percorrendo un amplo abano de estilos musicais, dende o techno ao rock, aínda que sen esquecer as influencias tradicionais.