A parlamentaria socialista Noa Díaz reuniuse co alcalde de Dodro, Xavier Castro, para pór sobre a mesa a falta de partidas fixadas nos Orzamentos galegos para o devandito concello, “malia as súas importantes necesidades en obras de saneamento”. Esta realidade, dixo, é aínda máis chocante se temos en conta “que os concellos limítrofes gobernados polo PP recibirán financiamento, precisamente cubrindo a totalidade do custo das obras para saneamento”.
A deputada socialista viaxou ata a localidade para cualificar de “desleixo” a actitude da Xunta co municipio, “ao figurar cero euros de investimento no concello no proxecto de orzamentos partidista e electoralista que están presentando durante toda esta semana no Parlamento galego”. Nas súas palabras, “estase a producir un agravio comparativo ao recibir os concellos lindeiros gobernados polo PP, cartos para obras de saneamento por parte de Augas de Galicia, precisamente o que demandan dende o Goberno local”.
Acompañada do alcalde, Xavier Castro, a socialista explicou que “mentres que aos gobernos do PP páganlle a totalidade da obra de saneamento, aos de distinta cor política, nomeadamente o concello de Dodro cunha alcaldía socialista, póñenlles escusas e invéntanse formulas como pagar a obra a partes iguais entre concello, deputación e Xunta”.
Ante estas “necesidade urxentes” dos veciños e veciñas da localidade dodrense, Díaz anunciou que dende o Grupo Socialista presentaranse emendas parlamentarias para “reverter a situación” e “garantir que teñan acceso a un dereito básico nun país avanzado do século XXI como é o sistema de saneamento e que un concello tan pequeno, para o que o custo da obra supón un gran investimento, poida recibir axuda da Administración galega”.
Pola súa banda, o alcalde Xavier Castro subliñou dous proxectos “imprescindíbeis” para os cales o Concello está facendo un “gran esforzo”, pero que precisan do financiamento da Xunta, da que non ve “ningún interese en mellorar a vida dos e das dodrenses”. Estas dúas iniciativas son as melloras da depuradora do Dodriño, proxecto aprobado no 2019 por Augas de Galicia e que “meteron nun caixón”, así como a ecolagoa que se está a crear para dotar a cinco aldeas de saneamento.
